Die multimiljoenrandse asbesdakverwydering-saak is vandag terug in die hooggeregshof in Bloemfontein waar agtien beskuldigdes – insluitend die voormalige ANC sekretaris-generaal, Ace Magashule – tereg staan op klagte van korrupsie en geldwassery.
Dit hou verband met die beweerde onreëlmatige toekenning van die asbesdakverwyderingskontrak van R255-miljoen in die Vrystaat in Oktober 2014.
Die verhoor is van vandag af tot 23 Junie op die hofrol, maar sommige van die beskuldigdes het reeds aangedui dat hulle nie gereed is om met die verhoor voort te gaan nie.
Nog een van die beskuldigdes, die sakeman Edwin Sodi, se regsverteenwoordiger, advokaat Laurence Hodes sê hulle is ongelukkig oor die moontlikheid dat die saak uitgestel gaan word. Hy verteenwoordig ook Magashule.
Hodes meen sou die saak weer uitgestel word, sal hy en sy span eers in 2026 beskikbaar wees. Volgens hom het hy ander werk weggewys vir dié saak.
Ten spyte van die provinsie se besteding op dié projek is daar nagenoeg 36 000 huise in die Vrystaat wat nog asbesdakke het.
One Response
Ek hou nie my asem op oor hierdie aangeleentheid nie. Maak julle maar gereed vir ‘n uitgerekte saak. Daar al reeds persone wat aangedui het dat hulle “nog nie gereed is” vir die saak nie.
Neels
Bethlehem