Die Nasionale Hulpskema vir Studente, NSFAS, is met onmiddellike effek onder administrasie geplaas.
Die minister van hoër onderwys en opleiding, Buti Manamela, het dié drastiese stap aangekondig weens voortdurende onstabiliteit en ernstige foute in die skema se bestuur en finansies.
Professor Hlengani Mathebula is as administrateur aangestel om volle beheer oor die instansie oor te neem.
Volgens Manamela kon die regering nie langer toekyk hoe stelsels in duie stort nie, aangesien NSFAS se werkverrigting deurslaggewend is vir sowel universiteite as die staat.
Die ingryping volg op ’n vlaag bedankings deur raadslede en wydverspreide bedryfsprobleme wat die uitbetaling van studiefondse kniehalter.
