Die Nasionale Raad van Dierebeskermingsverenigings, die NDBV, het met die Nasionale Perdewedren-owerheid vergader om hul kommer oor renperde – wat in die #ReinInThePain-veldtog uiteengesit word – te bespreek.
Die NDBV vra dringende ingryping om renperde te beskerm.
Kommer bestaan oor die gebruik van tongbande en perde wat te jonk is om aan wedrenne deel te neem. Die DBV se raadgewende veearts, dr. Bryce Marock, sê dierewelsyn moet voorkeur bo kommersiële belange geniet.
Hy vra strenger wetstoepassing, strafregtelike vervolging waar nodig, ’n verbod op skadelike instrumente en dat geen perde aan wedrenne mag deelneem alovrens hulle gebeente volledig ontwikkel is nie.
Dr. Marock sê dit sal betekenisvolle hervorming in Suid-Afrikaanse perdewedrenne meebring.
Die Perdewedrenowerheid het die NDBV tydens die vergadering versoek om sy amptelike beleidsverklaring wat dierewedrenne teenstaan te wysig na ’n beleid van produktiewe gesprekvoering.
Dr. Marock het egter gesê dat die DBV as bewaarder van dierewelsyn in Suid-Afrika nie ’n kompromis kan of sal aangaan betreffend sy regsmandaat om diere te beskerm ten einde samewerking te vergemaklik nie.
