Die munisipale bestuurder van die Madibeng-plaaslike munisipaliteit, Quiet Kgatla, is gisteraand in ‘n vermeende sluipmoordaanval op die R511 naby Hartbeespoort gewond nadat onbekende aanvallers verskeie skote op sy voertuig afgevuur het.
Hy het skietwonde aan sy arm en bekken opgedoen en is na ‘n hospitaal in Brits geneem.
Volgens ooggetuies is sowat 16 skote afgevuur, terwyl ondersoekers 11 koeëlgate in die voertuig getel het.
Sy termyn is gekenmerk deur voortdurende onstabiliteit, insluitend interne geskille oor administratiewe aanstellings, skorsings wat deur die hof tersyde gestel is en forensiese ondersoeke na munisipale verkrygingsprosesse.
Die polisie ondersoek die voorval en beeldmateriaal van ‘n paneelkamera is as deel van die ondersoek oorhandig.
