‘n Magstryd woed glo binne die regering se ekonomiese leierskap oor die bestuur van die Openbare Beleggingskorporasie.
Die OBK se raad, onder voorsitterskap van die adjunkminister van finansies David Masondo, het die uitvoerende hoof Patrick Dlamini en hoofbeleggingsbeampte August van Heerden voorlopig geskors ná bewerings in ‘n anonieme fluitjieblaserverslag.
Die skorsing hou verband met bewerings dat Dlamini sonder die raad se goedkeuring ‘n forensiese ondersoek na ‘n omstrede Lanseria-lughawe-transaksie gelas het, asook beweerde bestuurs- en belangebotsingskwessies.
Die minister van finansies, Enoch Godongwana sou glo nie vooraf oor die besluit ingelig gewees het nie en het vrae laat ontstaan oor die raad se optrede.
Ondersteuners van Dlamini voer egter aan dat die klagtes deel is van ‘n veldtog om bevindings van die forensiese ondersoek te onderdruk. Die Finansiële Sektor Gedragsowerheid ondersoek die aangeleentheid.
