Louis Liebenberg, wat saam met agt ander beskuldigdes op meer as 50 aanklagte van bedrog, rampokkery en geldwassery teregstaan, is vandag deur die hof vir 30 dae se psigiatriese waarneming na die Weskoppies-hospitaal verwys.
Dié besluit volg ná sy ontwrigtende gedrag in die hof, insluitend disrespek teenoor die landdros en ‘n fokus op sy eie menings eerder as die borgtogaansoek.
Hoewel ‘n distriksgeneesheer bevind het dat Liebenberg wel toerekeningsvatbaar is, het die landdros bevind dat verdere waarneming nodig is om sy vermoë om aan die hofverrigtinge deel te neem, te evalueer. Liebenberg, wat homself verteenwoordig, het aangedui dat hy nie die nodige mediese sorg in aanhouding ontvang nie en kla oor verskeie gesondheidsprobleme.
Hy het ook gevra dat die huidige landdros homself aan die saak moet onttrek weens beweerde partydigheid.
Die hof sal op 29 Augustus hoor of daar ‘n bed by Weskoppies beskikbaar is. In die tussentyd bly Liebenberg in aanhouding by die Kgosi Mampuru II-gevangenis se C-Max-afdeling.
Die hofsaak teen hom en sy medebeskuldigdes is intussen uitgestel.
One Response
Ou Louis Luis werk met ‘n plan. Wie weet, is Weskoppies se kos beter as die tronk se kos? Ek vra namens ‘n vriend.