15 Februarie 2024
Die DA in Gauteng doen ‘n beroep vir die afwenteling van polisiemagte, vanaf nasionale na provinsiale regering.
Die stap sal die provinsie in staat stel om sy gespesialiseerde polisie-eenhede te hê om misdaadverwante kwessies endemies aan Gauteng te hanteer.
Die idee is vandag deur die Gautengse leier en premierskandidaat van die DA, Solly Msimanga, voorgehou.
Dít in aanloop tot die Gautengse premier, Panyaza Lesufi, se provinsiale staatsrede wat volgende week gelewer sal word.
Msimanga sê daar kan nie slegs een benadering wees om misdaad te pak nie.
Volgens hom het Gauteng ‘n gespesialiseerde polisie-eenheid nodig en is die misdaadvoorkomingsbewaarders – ook bekend as ‘amaPanyaza’ – nie die oplossing nie, aangesien hulle nie behoorlik opgelei is nie.
