Die adjunk-nasionale polisiekommissaris verantwoordelik vir polisiëring, Tebello Mosikili, het Suid-Afrikaners gewaarsku om nie gevaarlike of tradisionele wapens tydens beplande betogings op 30 Junie te dra nie.
Sy het tydens ’n mediakonferensie saam met waarnemende minister van polisie, Firoz Cachalia gesê daar sal streng opgetree word teen enigiemand wat die wet oortree.
Dit sluit enige wapens soos spiese, sambokke en luggewere in.
Cachalia sê die regering ondersteun vreedsame betogings, maar sal nie geweld, intimidasie of onwettige optrede toelaat nie.
Die polisie is landswyd op hoë gereedheidsgrondslag met gedetailleerde operasionele planne om gemeenskappe en kritieke infrastruktuur te beskerm.
Die minister van verdediging Angie Motshekga sê intussen huidige intelligensie dui nie op enige onmiddellike bedreiging van wydverspreide onrus op 30 Junie nie.
Die Suid-Afrikaanse Nasionale Weermag is op gereedheidsgrondslag geplaas om die polisie te ondersteun indien geweld sou uitbreek, terwyl verskeie regeringsdepartemente deel is van die operasionele plan om stabiliteit te handhaaf.
Owerhede sê die veiligheidsoperasie kos die staat meer as R600 miljoen.
