Suid-Afrikaners kan nou by 753 banktakke landswyd vir slim-ID-kaarte aansoek doen, nadat die Departement van Binnelandse Sake sy doelwit vir die uitbreiding van die diens vier maande vóór die sperdatum bereik het.
Die minister van binnelandse sake, dr. Leon Schreiber sê dat meer as een miljoen Suid-Afrikaners reeds van die nuwe digitale diens gebruik maak.
Die departement het met die digitale vennootskap met die banksektor wat op 9 Maart vanjaar bekendgestel is, onderneem om die diens teen Maart 2027 uit te brei. Die teiken is egter binne vier maande bereik.
Die departement sê dat slegs 214 kantore van Binnelandse Sake aan die begin van die huidige administrasie toegerus was om aansoeke vir slim ID-kaarte te verwerk.
“Met die toevoeging van 753 deelnemende banktakke is die diens by altesaam 967 plekke landswyd beskikbaar. Dit is ’n toename van meer as 350% in slegs 246 dae,” sê Schreiber.
Volgens Schreiber versnel die uitbreiding óók die uitfasering van die ou groen identiteitsboekie om identiteitsdiefstal hok te slaan, met nog banktakke wat binnekort by die vennootskap ingesluit word.
Die departement sê dat die diens burgers in staat stel om sonder voorafbesprekings of papierwerk by deelnemende takke van ABSA, Capitec, FNB en Standard Bank vir ’n slim ID-kaart aansoek te doen.
