Die minister van Finansies, Enoch Godongwana, lewer vanmiddag om 14:00 die Mediumtermyn-begrotingsbeleidsverklaring, oftewel die sogenaamde mini-begroting, in die Parlement. Die verklaring word aangebied teen ’n moeilike ekonomiese agtergrond, met stygende brandstofpryse, toenemende lewenskostes en druk op Suid-Afrikaanse huishoudings.
Die oorlog in die Midde-Ooste het tot verdere onsekerheid oor brandstofpryse bygedra, terwyl die ekonomie steeds sukkel om voldoende werksgeleenthede te skep. Ekonome sal veral let op die regering se planne om staatskuld en besteding te bestuur, asook die vooruitsigte vir ekonomiese groei en werkskepping.
BOSA se burgemeesterskandidaat vir die Kaapstad-metro, Roger Solomons, lei intussen vandag ’n betoging buite die Parlement. Die party eis praktiese verligting vir huishoudings wat deur die stygende lewenskoste geraak word, insluitend ’n verlaging in die algemene brandstofheffing om druk op vervoer- en voedselkostes te verlig.
Die burgerregte-organisasie, AfriForum doen ook ’n beroep op Godongwana om brandstofheffings te verlaag. Volgens die organisasie vorder die regering byna R7,50 aan heffings op elke liter brandstof.
AfriForum wys daarop dat belastinginvordering tussen April en Augustus byna agt persent hoër as verwag was. Die organisasie meen dit kan ruimte vir belastingverligting skep.
Die burgerregte-organisasie vra verder dat vermorste staatsbesteding besnoei, wanfunksionele staatsinstellings hervorm en strenger beheer oor munisipale skuld toegepas word.
Die mini-begroting sal na verwagting onder meer aandui hoe die regering beoog om die land se finansies te bestuur, terwyl huishoudings en ondernemings met hoër kostes worstel.
