Walter Ernst
Ondanks ’n voortslepende regstryd met die inligtingsreguleerder, het die departement van basiese onderwys bevestig dat die 2025-matriekuitslae wel volgende week in die media sal verskyn.
Die woordvoerder van die departement, Terence Khala, sê die departement volg hul regspan se advies om voort te gaan met publikasie. Die minister van basiese onderwys, Siviwe Gwarube sal Maandag haar amptelike rede lewer, waarna uitslae vanaf Dinsdag op die departement se webwerf beskikbaar sal wees.
Hoewel die Inligtingsreguleerder aanvoer dat mediapublikasie leerlinge se privaatheid en die Popia-wet skend, bly die vroeëre hofuitspraak wat dié verbod opgehef het, tans van krag.
Die reguleerder se appèlaansoek is steeds hangende, maar stuit nie die departement se huidige planne nie.
Pretoria FM se e-publikasie, Nuusweek, sal ook volgende week Dinsdag die matriekuitslae publiseer.
Fotokrediet: Netwerk24
