Walter Ernst
’n 58-jarige man, Mark Allen Geralds, is gisteraand in Florida vir die moord op Tressa Pettibone in Februarie 1989 tereggestel. Geralds was ’n skrynwerker wat ’n jaar vóór die aanval opknappingswerk by die huis gedoen het.
Dit was die agtiende teregstelling in Florida vanjaar, wat dit die meeste nóg vir dié Amerikaanse staat maak. Geralds het Pettibone en haar twee kinders ’n week voor die moord by ’n winkelsentrum raakgeloop. Haar man was uitstedig vir werk. Geralds het haar seun by die speletjiesarkade genader en gevra wanneer hul pa terugkeer en wat hulle skoolroetine behels.
Pettibone is daarna tydens ’n huisinbraak doodgesteek. Haar agtjarige seun het op haar liggaam in hul Panama City-woning afgekom. Ondersoekers het bevind dat Geralds op die middag van die aanval juweliersware met Pettibone se bloed daarop verpand het en plastiekkabelbinders wat gebruik is om haar vas te maak is in sy besit gevind.
Geralds het, nadat sy doodsvonnis verlede maand bevestig en die teregstellingsdatum vasgestel is, aan ’n regter gesê dat hy nie verder daarteen gaan appelleer nie.
Fotokrediet: AP/Curt Anderson
