Ellen Diedericks
Die hooggeregshof in Pretoria het oudpresident Jacob Zuma se aansoek om appèl aan te teken teen ‘n bevel wat in Oktober beslis het dat hy sy regskoste van R28,9-miljoen vir die verdediging van sy korrupsieklagtes moet terugbetaal, geweier.
Die staat het dié lywige bedrag namens hom betaal.
Die DA dring daarop aan dat Zuma se pensioen in beslag geneem moet word vir dié doel, aangesien die aanklagte persoonlike van aard was en die oudpresident vir sy eie regskostes moet pa staan.
Regter Anthony Millar het gesê om die hof se deure onbepaald oop te hou vir ‘n litigant wat weier om ‘n uitspraak te aanvaar dien geen doel nie.
Zuma het intussen vandag saam met die Franse wapenvervaardiger Thales in die hooggeregshof in Pietermaritzburg, KwaZulu-Natal verskyn in verband met die ANC-regering se dekades-lange wapenskandaal.
Die hof hoor hul verlof tot appél-aansoek aan, nadat hul aansoeke om die aanklagtes teen hulle te skrap van die hand gewys is.
Die saak spruit uit die 1999 wapenskandaal waarin Thales ‘n kontrak van miljarde rand gekry het om vlootwapenstelsels te verskaf.
