“Vertroue in polisie moet verbeter,” sê Ramaphosa by beraad

President Cyril Ramaphosa sê ‘n kultuur van eerlikheid en integriteit moet by die Suid-Afrikaanse Polisiediens ingeburger word.

Ramaphosa het vandag die heel eerste polisiëringsberaad in Kempton Park geopen.

Hy sê gemeenskappe kla gereeld oor polisielede wat betrokke is by bedrog en korrupsie, en dat dit lei tot swakker polisiëring.

Ramaphosa het bygevoeg dat die moraal in die polisiediens verbeter moet word, dat gemeenskappe se betrokkenheid by veiligheid opgeskerp moet word, en dat daar strategieë ontwikkel moet word om fluitjieblasers beter te beskerm.

Volgens hom is die regering ook steeds daartoe verbind om ‘n kultuur van eerlikheid, en verantwoordbaarheid by alle staatsdienste te vestig. Ramaphosa meen landsburgers se vertroue in die polisie moet dringend verbeter.