Die uitvoerende hoof van die Padongelukkefonds, Collins Letsoalo, is met onmiddellike ingang op spesiale verlof geplaas.
Die besluit is geneem deur die POF-raad wat gister ‘n spesiale vergadering gehou het. Letsoalo sal op spesiale verlof wees totdat ‘n ondersoek deur die Spesiale Ondersoek-eenheid (SOE) afgehandel is.
Daar is na bewering onder Letsoalo se leierskap, verdagte betalings aan verskeie regsfirmas gemaak, en ondersoek die SOE ‘n klag van korrupsie.
Volgens die raad het hulle die besluit geneem as ‘n voorsorgmaatreël, en beteken nie noodwendig dat Letsoala skuldig is of dissiplinêre stappe in die gesig staar nie. Sy termyn kom in Augustus vanjaar tot ‘n einde en hy sal sy volle salaris in hierdie tyd ontvang.
Die adjunk-minister van vervoer, Mkhuleko Hlengwa, sê die besluit is geneem om genoeg kans te gun vir ‘n deeglike, onafhanklike ondersoek om plaas te vind.
Phathutshedzo Lukhwareni sal gedurende hierdie tyd as die waarnemende uitvoerende hoof van die POF dien.
