5 Februarie 2025
“Die ANC se bereidwilligheid om met die DA in gesprek te tree oor die Nasionale Gesondheidsversekering (NGV) is ‘n stap in die regte rigting, maar dit is steeds nie goed genoeg nie.”
Dít volgens Solidariteit wat verder aanvoer dat die “kwansuise” toegewing steeds nie die onderliggende kernprobleme van die NGV aanraak nie.
Solidariteit sê die onlangse kompromie tussen die ANC en die DA oor ‘n voorstel om mediese fondse te behou dui op ‘n mate van vordering.
‘n Ekonomiese navorser verbonde aan die Solidariteit Navorsingsinstituut, Theuns du Buisson, sê alhoewel hierdie voorstel voorsiening maak vir die voortbestaan van private mediese fondse, beteken dit steeds nie dat lede van mediese fondse van die verpligte finansiële bydrae tot die NGV kan ontsnap nie.
Hy sê die gesprek tussen die ANC en die DA kan as ‘n positiewe teken beskou word. Tog is dit duidelik dat die voorgestelde veranderinge en die kompromie waartoe die twee partye wil kom, nie die kernprobleme van die NGV oplos nie.
Du Buisson sê lede van mediese fondse sal steeds ‘n verpligte bydrae tot die NGV moet maak, ongeag of hulle reeds vir ʼn private mediese fonds betaal.
Hy sê die ANC/DA-kompromie bied geen verligting vir die dubbele finansiële las wat op lede van mediese fondse geplaas sal word nie.
