25 November 2024
Solidariteit het ‘n hofaansoek teen die Wes-Kaapse Onderwysdepartement ingedien oor die proses wat die departement volg om sogenaamde oortollige onrderwysposte te besnoei.
Die Wes-Kaapse onderwysdepartement het in Oktober gesê hy het geen ander keuse as om 2 407 onderwysposte in die Wes-Kaap te sny nie. Die besluit is gemaak ná die tesourie ʼn begrotingstekort aangekondig het.
Solidariteit meen die vraag moet gevra word of dié besluite strook met die Wet op Arbeidsverhoudinge.
Die vakbond sê sy argument in hierdie saak fokus spesifiek op ʼn besluit van Hoërskool Bellville om drie van sy onderwysers, Werner Burger, Jeanne Biesenbach en Sophie Botha, se poste as oortollig te verklaar.
Volgens ‘n netwerkorganiseerder van Solidariteit se onderwysernetwerk, Anlia Archer, het die drie onderwysers kernvakke soos Afrikaans en Wiskunde aangebied. Ná hulle afdanking is hul poste nietemin deur die skool se beheerliggaam met ander kandidate gevul.
“Dit blyk ons lede is spesifiek geteiken, want die kwansuise oortollige poste is kort ná die besnoeiings wél deur die beheerliggaam van Hoërskool Bellville gevul.
Solidariteit voer aan dat hierdie optrede die onderwysers se regte skend en beskou dit as ʼn voorbeeld van swak besluitneming deur die departement.
