Slegs 19% van skoolpersoneel se misdaadrekords met seksregister vergelyk

Slegs 19% van alle skoolpersoneel en opvoeders se misdaadrekords is vergelyk met dié van die registers van seksoortreders.

Dit ten spyte van ‘n opdrag van die departement van basiese onderwys dat alle amptenare – insluitend dié in kantoor- en skoolgebaseerde poste – gekeur moet word.

Die minister van basiese onderwys, Siviwe Gwarube, het in antwoord op ‘n parlementêre vraag van die IVP se Liezl van der Merwe, gesê dat daar twee registers is wat nagegaan moet word.

Die een word deur die departement van justisie en grondwetlike ontwikkeling geadministreer en die ander deur die departement van maatskaplike ontwikkeling.

Van der Merwe het na aanleiding van die verkragting van ‘n 7-jarige van die Oos-Kaap gesê dat sy graag sal wil sien dat alle personeel gekeur moet word ingevolge dié riglyne.