Die Suid-Afrikaanse Nasionale Weermag waarsku dat die uitbreiding van informele nedersettings op militêre eiendom een van die grootste strategiese veiligheidsrisiko’s vir die Departement van Verdediging is.
Die nedersettings lei glo tot onder meer kabel- en toerustingsdiefstal, onwettige elektrisiteits- en waterverbindings en skade aan veiligheidsinfrastruktuur.
Die departement beplan om nagenoeg R520,9 miljoen aan heinings en mure by militêre basisse te bestee, waarvan die grootste deel vir vier ammunisie-depots bestem is.
Parlementslede is egter ontsteld omdat ’n interdepartementele werkgroep wat 15 maande gelede ingestel moes word, steeds nie wesenlike vordering toon nie.
Hulle waarsku dat die situasie nasionale veiligheid, militêre gereedheid en die beskerming van strategiese bates in gevaar kan stel.
