Sanparke het sy sekuriteit in die Tafelberg Nasionale Park verskerp ná twee afsonderlike voorvalle naby Deer Park.
In die eerste aanval op 8 Julie is ’n Kaapse pastoor, Roger Pearce van Vredehoek, op Tafelberg aangeval met snywonde aan sy arm. Hy was naby Tafelbergweg in die omgewing van die Deadman’s Tree toe hy drie verdagtes in donker klere opgemerk het. Pearce is by die Mediclinic in Tuine behandel en het 10 steke gekry.
Die tweede voorval het minder as ’n week ná die eerste aanval op 13 Julie plaasgevind. ’n 52-jarige man is by die Platteklip-washuise aangeval, waarna hy weens sy beserings inmekaargesak het.
Sanparke sê dat hy sal voortgaan om haalbare bystand te verleen terwyl die voortdurende ondersoeke deur die polisie ondersteun word.
’n VF Plus-raadslid in die metro, Emre Uygun, sê dat die voortgesette rooftogte en gewelddadige aanvalle op stappers daadwerklike optrede vereis.
“Hierdie voorvalle is uiters kommerwekkend en beklemtoon die ernstige veiligheidsrisiko waaraan stappers en besoekers by een van Suid-Afrika se bekendste toerismebestemmings blootgestel word,” sê Uygun.
“Hoewel ’n gesamentlike operasie uitgevoer is, dien die operasie steeds nie as ’n afskrikmiddel vir hierdie aanvallers nie.”
Volgens Uygun is nie baie van die stappers bewus van die veiligheidsrisiko’s nie en in talle gevalle verkies slagoffers om nie klagte aanhangig te maak nie.
“Dit beperk die polisie se vermoë om sterk sake teen herhaaldelike oortreders te bou en beklemtoon die behoefte aan meer geteikende operasies.”
