Nuuskommentaar: 22 Januarie 2025
Deur: Ernst van Zyl
Tydens sy departement se onlangse jaarlikse prestasieplan-aanbieding aan die Portefeuljekomitee, het die minister van Handel, Nywerheid en Mededinging, Parks Tau, ’n plan voorgestel om 3% van ondernemings se jaarlikse netto wins ná belasting te onteien vir ’n nuwe R100 miljard-rasdiskriminerende “transformasiefonds”. Hierdie fonds, wat deur die Nasionale Bemagtigingsfonds geadministreer word, sal befondsing uitreik in ooreenstemming met BBBEE-rassekriteria.
Benewens die morele besware teen enige fonds wat finansies op grond van ras uitdeel, is dié fonds vrugbare teelaarde vir korrupsie. Die aansienlike vlakke van korrupsie en plundering wat die regering se R500 miljard-Covid-19-ondersteuningsfondse geteister het, dien as die perfekte voorbeeld van hierdie risiko. Daarby het dekades van rasdiskriminerende beleid onder die ANC-regering erg misluk om sy gestelde doelwitte te bereik om die armes op te hef en die werkloosheidskrisis te beveg. Die werkloosheidskoers het in werklikheid drasties gestyg sedert die instelling van hierdie nuwe raswette.
Die laaste ding wat die sukkelende Suid-Afrikaanse ekonomie nodig het is ’n verdere belasting en meer rassediskriminasie om ’n reeds vyandige besigheidsomgewing, wat deur belasting versmoor word, te vererger. Suid-Afrika se regering het reeds meer as 141 raswette in werking, wat dit die land maak wat die hoogste vlakke van ras-beheptheid ter wêreld toon. Hierdie skokkende statistiek is iets om oor skaam te wees, nie iets om te vier of selfs op uit te brei nie. Uit hierdie 141 raswette, was 116+ ingestel sedert 1994.
Daar is egter tekens dat die wind besig is om te draai teen raswette in Suid-Afrika. Onlangs het die Suid-Afrikaanse eenheid van Norton Rose Fulbright, ’n swaargewig in die internasionale regswêreld, aangekondig dat die firma die Suid-Afrikaanse regering hof toe neem oor die nuwe radikale ras-regulasies wat dit wil afdwing op die regsektor. Dit is verfrissend om te sien hoe korporatiewe uiteindelik begin rug styf maak teen wette was diskriminasie op gronde van ras afdwing.
Die tyd is duidelik ryp om die regering se lys raswette aan te vat. AfriForum het ’n petisie van stapel gestuur waar die publiek ’n einde aan die regering se rasdiskriminerende wette kan eis – www.StopRaswette.co.za. Hierdie tipe druk-aksies dra by tot die tydsgees wat besig is om te draai teen raswette.
Die ANC se mislukte rasbehepte eksperiment het lank genoeg aangehou. Dit is tyd om meritokrasie en ’n besigheidsvriendelike benadering ’n kans te gee.
