‘n Polisiebeampte staar dissiplinêre optrede in die gesig nadat hy in ‘n gemerkte polisiemotor – sonder ‘n deur aan die bestuurder se kant – op ‘n snelweg in Durban rondgery het.
‘n Ander motoris het ‘n video van die verskynsel geneem en op TikTok geplaas. Dit is reeds meer as 270 000 keer gekyk.
Volgens die KwaZulu-Natalse polisiewoordvoerder, kolonel Robert Netshiunda, was die betrokke motor vroeër die dag in ‘n ongeluk betrokke waartydens die deur verwyder is om die vroulike polisiebeampte uit die motor te kry. Hy sê ondanks die skade aan die motor, was dit steeds rybaar.
Die betrokke maatreëls van so ‘n geval is egter nie gevolg nie en ‘n ander beampte het met die deurlose motor tot by die polisiekantoor gery.
Netshiunda het namens die KwaZulu-Natalse polisiekommissaris, Nhlanhla Mkhwanazi, gesê dat die verontagsaming van reëls en prosedures nié geduld sal word nie.
Volgens Netshiunda sal daar opgetree word teen die beampte wat die motor bestuur het, die opdraggewende beampte, en enige ander betrokke persoon.
