Toeskouers by die afgelope naweek se wedstryd tussen die Springbokke en Skotland was die eerste om Loftus Versfeld se splinternuwe, multimiljoenrand-beligtingstelsel te beleef.
Die reuseprojek is in net minder as twee maande afgehandel, waartydens die Suid-Afrikaanse beligtingspesialiste, Afrison, al 272 van die stadion se ou vloedligte heeltemal vervang het. Elke enkele lig op die ikoniese hoektorings, afdakke en paviljoene is uitgeruil vir ultramoderne, energie-doeltreffende LED-tegnologie.
Vir die eerste keer in Loftus se geskiedenis is daar ook pasgemaakte kleurvertoonligte op die Oos- en Wesafdakke geïnstalleer, wat die weg baan vir meevoerende ligvertonings.
Met tradisionele stadion-gloeilampe wat wêreldwyd gestaak word en streng regulasies rondom die invoer van volledig saamgestelde kommersiële LED-stelsels, het Afrison die hardeware hier in Suid-Afrika vervaardig. Die nuwe toebehore bestaan uit 70% plaaslike komponente, en slegs die gespesialiseerde silikon-mikroskyfies en drywers waarvoor daar geen plaaslike verskaffer bestaan nie, is ingevoer.
Van Rooy van den Berg, Afrison se stigter en hoof uitvoerende beampte, sê hy glo in die krag van plaaslike ingenieurswese.
“As ’n trots Suid-Afrikaanse armatuurvervaardiger met 15 jaar se ondervinding in die bedryf, verstaan Afrison die unieke eise van ons omgewing. Ons beligtingstelsels is ontwerp om plaaslike toestande te weerstaan en konsekwent wêreldklasprestasie te lewer waar dit die meeste saak maak.”
Die ou ligte het by 1300 lux (’n maatstaf van ligintensiteit) begin sukkel en het tot 30 minute geneem om op te warm. Afrison se nuwe stelsel verseker ’n skaduvrye 2000 lux oor elke graspol, en aktiveer onmiddellik met die druk van ’n knoppie vanuit ’n sentrale beheervertrek.
Die opgradering vorm deel van ’n 20 jaar lange huurooreenkoms, en Afrison sal alle deurlopende instandhouding hanteer en toegewyde tegniese spanne op die terrein verskaf tydens elke wedstryddag.
Edgar Rathbone, hoof- uitvoerende beampte van die Blue Bulls-maatskappy, sê hy is baie trots op die projek.
“Loftus Versfeld het ’n ryke geskiedenis, maar om ’n wêreldklasstadion relevant te hou, beteken mens moet die toekoms tegemoet loop. Ons vennootskap met Afrison verseker dat ons nie net vir ons aanhangers en uitsaaiers die absolute beste visuele ervaring moontlik bied nie, maar dit beteken ons doen dit deur ’n volhoubare, plaaslik ontwerpte oplossing. Die bekendstelling van hierdie ligte by ’n Springbok-toetswedstryd is die perfekte viering van Suid-Afrikaanse innovasie.”
Lees meer berigte in dié uitgawe van Nuusweek-https://www.pretoriafm.co.za/wp-content/uploads/2026/07/NUUSWEEK-Uitgawe-75-17-Jul-2026.pdf
