Esmarie Yssel
Die polisie se jongste misdaadsyfers dui op ’n afname in kontakmisdade tussen April en September vanjaar.
Die waarnemende minister van polisie, Firoz Cachalia, het vanoggend die misdaadsyfers van die eerste en tweede kwartaal van die finansiële jaar in Pretoria vrygestel.
Volgens die jongste syfers het kontakmisdade met 3-komma-1-persent vergeleke dieselfde tydperk verlede jaar afgeneem.
Ondanks ’n afname in moord is daar egter steeds oor die sesmaandetydperk meer as elf-en-’n-half-duisend mense in die land vermoor. Dit is gemiddeld 63 moorde per dag tussen April en September.
Gauteng is die provinsie met die meeste moorde, gevolg deur KwaZulu-Natal.
Die minister het gesê hoewel daar ’n beduidende afname in die meeste misdaadkategorieë aangemeld is, bly seksuele oortredings, geslagsgeweld en handelsmisdade hardnekkig hoog.
