Die VF Plus sê die Noordwes-Universiteit (NWU) het ’n verantwoordelikheid om standpunt in te neem nadat die EFF die omstrede “Kill the Boer”-lied op die Potchefstroom-kampus gesing het.
Die party meen hoewel die optog kleiner was as wat verwag is, is die boodskap wat oorgedra is, steeds baie ernstig. Terwyl die EFF AfriForum as ’n “regse terroriste-organisasie” uitmaak, wys die VF Plus daarop dat Afrikaner-organisasies self nie geweld aanmoedig nie.
Die party vergelyk die situasie met 2014 toe ’n beweerde “Nazi-saluut” op die Potch-kampus groot opslae gemaak het. Destyds is daar vinnig teen die studente opgetree, ondanks die feit dat die groet reeds gestaak is. Nou, sê die VF Plus, kan die NWU nie agter “akademiese vryheid” wegkruip wanneer ’n lied met duidelike gewelddadige ondertone gesing word nie.
Die party meen universiteite moet in die huidige klimaat ’n duidelike standpunt inneem – al het die hof nog nie die lied as haatspraak verklaar nie.
