3 Januarie 2025
‘n Groot soektog is tans in Hercules, in die weste van Pretoria aan die gang nadat ‘n dogtertjie, van tussen 6- en 7 jaar oud, na bewering gisteraand in dié gebied ontvoer is.
Luidens ‘n verklaring van die Hercules gemeenskapspolisiëringsforum se sektor 2 is die kind glo by Bress Straat gegryp. Verskeie polisiebeamptes is tans besig om na die kind in ‘n veld op die hoek van Claremont- en Da Gama-straat te soek.
Die ondervoorsitter van die Hercules GPF, George Behrens, sê die kind is glo gisteraand in dié veld deur oogetuies gesien. Volgens die ooggetuies was daar twee mans by die kind, en het sy om hulp geskree toe sy die ooggetuies sien.
Die GPF is omstreeks 21:00 gisteraand na die toneel ontbied. Die soektog is weer teen 07:00 vanoggend hervat.
Volgens die GPF het die kind bruin, kort gesnyde hare en het sy ‘n pienk eenstuk, pretpakkie aangehad.
