Die waarnemende minister van polisie, prof. Firoz Cachalia, het met die proses begin om die KwaZulu-Natalse polisiekommissaris, luitenant-generaal Nhlanhla Mkhwanazi, as die nasionale hoof van die Valke aan te stel.
Cachalia het ’n memorandum aan die kabinet voorgelê om goedkeuring vir die aanstelling te versoek.
Die memorandum sal na verwagting so gou as moontlik tydens die volgende kabinetsvergadering ter tafel gelê word.
Die polisieministerie sê dat die aanstelling ten doel het om leierskap vir die Valke te verseker, wat ernstige prioriteitsmisdade, insluitend georganiseerde misdaad en korrupsie, ondersoek.
“Die Valke speel ’n kritieke rol in Suid-Afrika se stryd teen georganiseerde misdaad, korrupsie en ander ernstige prioriteitsmisdade. Dit is ’n prioriteit vir die herstelagenda,” het die ministerie in ’n verklaring gesê.
“Die aanstelling van ’n nasionale hoof is belangrik om sterk leierskap, strategiese rigting en operasionele doeltreffendheid in die aanspreek van hierdie misdade te verseker,” het Cachalia in ’n verklaring gesê.
