Die departement van onderwys in Gauteng sê hy is uiters geskok om te verneem van ‘n voorval gister waartydens ‘n leerling in Graad 11 aan die Lesedi Sekondêre Skool in Lethabong in Donkerhoek, Pretoria deur ‘n mede-leerling doodgesteek is.
Die woordvoerder van die departement, Steve Mabona sê die kind is na bewering deur ‘n Graad 12-leerling aan dieselfde skool met ‘n mes aangeval waarna hy later aan sy beserings beswyk het.
Hy sê voorlopige ondersoeke dui daarop dat die matriekseun nié gister by die skool was nie, maar het na skool opgedaag op dieselfde tyd wat leerlinge besig was om die terrein te verlaat. Hy het die slagoffer genader en hom ten aanskoue van die ander kinders begin aanval.
Hy is na ‘n plaaslike hospitaal gehaas, maar is met sy aankoms dood verklaar. Volgens Mabona is beradingsdienste aangebied. Die voorval word deur die polisie ondersoek.
Die LUR vir onderwys in Gauteng, Matome Chiloane, sê die departement is geskok deur die voorval. “Geen kind moet sy lewe verloor terwyl hy onderrig ontvang nie.” Hy het sy medelye met die skool en die naasbestaandes getuig.
One Response
Die voorbeelde wat kinders in hierdie land kry is om probleme met geweld te probeer oplos.
Barnd alle af, skiet mense dood pleeg ook ander gewelds misdade.
Gebrek aan dissipline in ons dae is jou waentjie gesmeer.