Die DA in Gauteng beweer hartpasiënte sterf weens swak chirurgiese uitkomste by die kardiotorakale afdeling van die Charlotte Maxeke Johannesburg-hospitaal.
Die party se skadu-LUR vir gesondheid, Jack Bloom, sê ’n senior chirurg het verlede jaar bedank uit protes oor wat hy beskryf as ’n gebroke stelsel, swak opleiding en intimidasie van jong dokters.
Bloom beweer die werklike sterftesyfer vir hartoperasies kan tot sowat 20% wees, ten spyte van amptelike syfers wat ’n verbetering toon.
Hy sê dit dui op ’n moontlike toesmeer van probleme.
Die saak is na die Gesondheidsombud verwys vir ’n onafhanklike ondersoek.
Die DA vra vir groter deursigtigheid en dring aan op ingryping om pasiëntveiligheid te verbeter.
