Die burgemeester van Johannesburg, Dada Morero sê die vinnige groei van informele nedersettings plaas toenemende druk op Johannesburg se behuising, elektrisiteit en basiese dienslewering.
Hy het tydens sy stadsrede gesê onwettige grondbesettings vertraag ontwikkeling en vererger die metro se infrastruktuur-agterstand, wat nou meer as R220 miljard beloop.
Morero het aangekondig dat Johannesburg ’n volledig befondsde begroting van R89,4 miljard vir die 2025/26-boekjaar aanvaar het en hoop om ’n bedryfsurplus van R4,1 miljard te toon.
Hy sê die metro sal saam met Eskom en die nasionale regering werk om die energiekrisis die hoof te bied en beplan ook om nie-strategiese bates te verkoop om finansies te stabiliseer.
Morero het inwoners gevra om geduldig te bly terwyl Johannesburg probeer herstel ná jare van agteruitgang.
