Die voorsitter van die parlementêre portefeuljekomitee oor water en sanitasie, Leon Basson, meen drastiese besnoeiings aan die departement van water en sanitasie se begroting kan moontlik Suid-Afrika se waterkrisis vererger.
Hy het dié waarskuwing gerig nadat die minister van water en sanitasie, Pemmy Majodina, haar departement se begroting en jaarlikse prestasieplanne vir 2026-’27 bekend gemaak het.
Basson meen die departement se begrotingsvermindering van R23-miljard tot R21-miljard is fundamenteel teenstrydig met die land se waterwerklikheid.
Hy meen die oplossing van Suid-Afrika se waterprobleme vereis volgehoue finansiering, langermyn beplanning en die versnelde inwerkingstelling van groot infrastruktuurprojekte.
Majodina sê egter daar is reeds ‘n nasionale water-aksieplan opgestel, wat na goedkeuring glo op 30 April bekend gemaak sal word.
