17 Januarie 2025
Die burgerregtegroep, AfriForum sê hy versoek ‘n dringende vergadering met die minister van polisie, Senzo Mchunu, oor ‘n toename in plaasaanvalle.
Volgens Afriforum se hoofwoordvoerder oor gemeenskapsveiligheid, Jacques Broodryk was daar minstens 33 plaasaanvalle, en sewe moorde van die begin van Desember af.
“In sommige gevalle is die slagoffers aangerand en selfs gemartel.”
Hy sê hierdie tendens het landelike gemeenskappe toenemend kwesbaar gelaat en ernstige kommer oor veiligheid, voedselsekerheid en ekonomiese stabiliteit laat ontstaan
Broodryk sê samewerking is van die uiterste belang om dié probleem te takel.
Hy meen hierdie aanvalle bedreig nie net mense se lewens nie, maar stel ook die toekoms van die land se landbousektor in gevaar.
“Die voorgestelde vergadering met Mchunu het ten doel om beter samewerking tussen AfriForum se veiligheidstrukture en die SAPD te bewerkstellig, met die fokus op verbeterde kommunikasie, gekoördineerde operasies, kapasiteitsbou en gemeenskapsbetrokkenheid,” sê Broodryk.
