’n Uitbreking van vermoedelik Afrika-varkpes het in Gqeberha ’n aantal varkvrektes veroorsaak, met nagenoeg ’n dosyn karkasse wat die afgelope week in die Grogro-gemeenskap naby Sherwood gevind is.
Die plaaslike owerhede sê daar is aanvanklik vermoed dat die diere vergiftig is, maar toetsresultate het nou daarop gewys dat die hoogs aansteeklike varksiekte waarskynlik die oorsaak is.
Die siekte versprei vinnig tussen varke en lei dikwels tot dood, maar dit is nie gevaarlik vir mense nie.
Die Nelson Mandelabaai-munisipaliteit sê nagenoeg nege karkasse is reeds verwyder, maar inwoners beweer die aantal dooie varke kan hoër wees en dat sommige lank in die gebied bly lê het, wat gesondheidsrisiko’s vir die gemeenskap inhou.
Vee- en gesondheidsbeamptes werk nou in die gebied om verdere verspreiding te beperk.
