Die Onafhanklike Polisieondersoekdirektoraat (Opod) se verslag oor die inbraak en diefstal op president Cyril Ramaphosa se Phala Phala-wildsplaas in Limpopo, is gedeklassifiseer.
Die minister van polisie, Firoz Cachalia het dít bekend gemaak in reaksie op ’n geskrewe parlementêre vraag deur die ATM. Volgens Cachalia is die verslag op 2 Februarie vanjaar gedeklassifiseer, nadat Opod die aanvanklike redes waarom die dokument geklassifiseer is asook die openbare belang daarvan oorweeg het.
Hy beklemtoon egter dat Opod nie die inbraak en diefstal ondersoek het nie, maar die gedrag van die polisiebeamptes wat die saak ondersoek het.
Cachalia sê ook Opod se ondersoekverslae word nie vir die publiek geskep nie en sal daarom slegs toeganklik wees deur die nodige regsprosesse te volg.
