109 besigheidslikwidasies in April aangeteken

Statistiek Suid-Afrika (SSA) sê dat daar 109 besigheidslikwidasies in April vanjaar aangeteken is – wat die totale aantal sluitings in die eerste vier maande van die jaar op 482 te staan bring.

April se likwidasies is 13,2% meer wanneer dit met dieselfde tydperk verlede jaar vergelyk word.

Volgens SSA is dit ‘n teken van die vlaag van probleme in die land se besigheidsomgewing.

Vrywillige likwidasies in Suid-Afrika het op ‘n jaargrondslag met 25,7% toegeneem, terwyl verpligte likwidasies – wat deur krediteure gelei is – met 29,4% afgeneem het.

Volgens Business Insider kan die afname aan verpligte likwidasies ‘n teken wees dat al hoe meer entrepreneurs waarskynlik kies om hulle besighede se deure te sluit as ‘n voorkomingsmaatreël te midde van die ekonomiese uitdagings in Suid-Afrika.

Besighede het aangedui dat kragvoorsieningsprobleme en die hoë koste van kragopwekkers ook tot die sluiting van besighede bydra.