31 Januarie 2025
Geluk was aan bemanningslede en passasiers, aan boord ‘n FlySafair-vlug, se kant toe daar toevallig ‘n gekwalifiseerde vlieënier beskikbaar was om handjie by te sit toe die vlieënier tydens die vlug siek geraak het.
Vlug FA711 was Woensdagoggend, 29 Januarie van George na Johannesburg op pad toe die vlieënier naby hulle eindbestemming so siek begin voel het dat hy nie verder kon vlieg nie.
FlySafair sê in ‘n verklaring dat die medevlieënier, wat ook ten volle opgelei is, beheer oor die vliegtuig geneem het om gereed te maak vir die landing. Ingevolge maatreëls het die medevlieënier versoek dat landingsklaring vir dié vlug geprioritiseer moet word.
Hy het toe oor die vliegtuig se interkom gevra of daar enige gekwalifiseerde vlieëniers aan boord was, wat hom kon bystaan met die landing. Volgens FlySafair is hulle uiters dankbaar dat daar wel ‘n vlieënier was wat die nodige kontrolelyste vir die medevlieënier kon voorlees. Die passasier het nie self gevlieg nie.
Die vliegtuig het 12:30 veilig in Johannesburg geland. Nooddienste het reeds gewag sodat hulle die kaptein mediese behandeling kon toedien. “Passasiers was deurlopend kalm, en het hulle samewerking gegee.”
FlySafair het die medevlieënier bedank vir sy professionaliteit en nakoming van al die veiligheidsmaatreëls. Die lugdiens het verder die passasier bedank, en die kaptein ‘n vinnige herstel toegewens.
