Die VF Plus het die prokureur, Willie Spies, as hul burgemeesterskandidaat vir die Tshwane-metro aangewys.
Die leier van die VF Plus, dr. Corné Mulder het vandag Spies se kandidaatskap in Pretoria aangekondig. Die bekende raadslid en voormalige burgemeesterskomiteelid vir veiligheid, Grandi Theunissen, is as die tweede burgemeesterskandidaat aangewys.
Sáám sal dié gesoute span die plaaslikeregeringsverkiesing, wat later vanjaar verwag word, aanpak.
Spies het onlangs afstand gedoen van sy rol as uitvoerende voorsitter van Pretoria FM om heeltyds sy aandag aan die VF Plus en die Tshwane-burgemeestersveldtog te wy.
Spies het die afgelope 20 jaar as burgerregteprokureur in Pretoria gewerk. Hy sê dat dit noodsaaklik is dat die politiek en gemeenskap hande moet vat sodat die staat kan terugtree en daardeur groter mag aan die gemeenskap te gee.
Spies sê hy wil Pretoria weer ’n suksesvolle metro maak.
