Die VF Plus eis dat daar daadwerklik opgetree word teen lede van die Ekurhuleni-metropolisie ná die protesaksie, wat vanoggend tot erge vertragings op van die hoofpaaie in dié metro gelei het.
Die VF Plus-raadslid in die Ekurhuleni-metro, Jennifer Glover, sê die lede het hoofroetes soos die N3, N12 en R21 versper glo weens loon-dispute.
Glover sê die lede voer aan hulle is ontevrede oor salarisaanpassings, oortyd wat beperk word en onbillike arbeidspraktyke.
Volgens die Wet op Arbeidsverhoudinge mag metropolisielede nie aan stakings deelneem en dienslewering belemmer nie. Staatsvoertuie mag uitsluitlik aangewend word vir verkeersveiligheid en die toepassing van wet en orde.
Glover het benadruk om onskuldige mense te verontrief is nie die manier om ʼn loongeskil op te los nie.
