Suid-Afrika se staatsgesondheidstelsel word op sy knieë gedwing met bykans 6000 dokters en verpleegkundiges wat op ’n jaargrondslag uit staatsgesondheidsorggeriewe bedank.
Amptelike syfers van die sogenaamde Persal-stelsel toon dat die land tussen 2013 en 2025 12 700 dokters en byna 59 000 verpleegkundiges uit die openbare gesondheidsorgstelsel verloor het.
Dié syfers is deur die minister van gesondheid, dr. Aaron Motsoaledi bekend gemaak in antwoord op ’n parlementêre vraag van die DA-LP, Michéle Clarke.
Gauteng is die ergste getref, gevolg deur KwaZulu-Natal en die Wes-Kaap. Die krisis het glo in 2021 en 2022 ’n hoogtepunt bereik.
Die departement het die probleem deels toegeskryf aan jong mediese personeel wat nie in plattelandse gebiede wil werk waar hulle vir gemeenskapsdiens uitgeplaas word nie. Dokters en ander gesondheidsorgwerkers wat toegelaat word om in privaat praktyke te werk wanneer hulle nie by die staat op die klok is nie, is nou ook onder bespreking. Minister Motsoaledi blameer die misbruik van lonende werk buite die openbare diens vir dokters se afwesigheid en laatkom by openbare gesondheidsorggeriewe.
