Die beweerde meesterbrein agter die tenderbedrogskandaal van R635 miljoen by die Tembisa-hospitaal in Ekurhuleni, Stefan Govindraju, is vandag op borgtog van R200 000 vrygelaat.
Die 37-jarige sakeman het in die landdroshof in Palm Ridge verskyn op aanklagte van bedrog, korrupsie en geldwassery.
Die staat het nie sy borgaansoek teengestaan nie. Die Valke het Govindraju Vrydagmiddag by die O.R. Tambo Internasionale Lughawe in hegtenis geneem net nadat hy uit die buiteland teruggekeer het.
Lees ook: SOE kry groen lig om beweerde korrupsie by Thembisa-hospitaal te ondersoek
Die tenderbedrog het aan die lig gekom na die sluipmoord op die fluitjieblaser, Babita Deokaran.
Deokaran is in Augustus 2021 voor haar huis in Johannesburg in haar motor doodgeskiet. In Augustus 2022 het bewerings aan die lig gekom dat die hospitaal R498 000 betaal het vir noupyp denimbroeke.
Ondersoeke deur die Spesiale Ondersoekeenheid dui daarop dat amptenare by die hospitaal en diensverskaffers saamgewerk het om amptelike tenderprosesse te omseil.
