Suid-Afrika se hoë kommissaris in Indië, Anil Sooklal, is vrygespreek van enige wangedrag rakende die oudpresident Jacob Zuma en een van die Gupta-broers Ajay Gupta se onlangse oorsese reis na Indië.
Dit volg ná hewige openbare kritiek toe foto’s van Sooklal saam met Zuma en die omstrede sakeman Ajay Gupta opgeduik het.
Volgens ’n verklaring deur die Departement van Internasionale Betrekkinge en Samewerking (Dirco) het ’n interne ondersoek bevind dat die Sooklal in Nieu-Delhi geen private vergaderings met Zuma en Gupta gereël, gefasiliteer óf daaraan deelgeneem het nie.
Lees ook: Antwoorde geëis ná Zuma, Gupta-broer se Indië-besoek
Dirco sê dat die protokol en logistieke bystand wat aan Zuma verskaf is, deel was van die gevestigde ondersteuning wat deur amptelike kanale aan voormalige presidente beskikbaar is.
“Wat sy bywoning van die godsdienstige byeenkoms in Haridwar betref, het die Sooklal dit in sy hoedanigheid as sendinghoof bygewoon, na ’n aparte uitnodiging van die gasheerorganiseerders”.
Die departement het ook Sooklal se bywoning van ’n godsdienstige geleentheid in Haridwar aangespreek, waar Gupta na bewering onder sowat 1 000 genooide gaste was.
Pretoria FM het vroeër berig dat Dirco ’n beleidsraamwerk geformuleer het ten einde die buitelandse reise van voormalige staatshoofde te reguleer en te koördineer.
