Die oudpolitikus en sakeman, Roelf Meyer, is deur president Cyril Ramaphosa as Suid-Afrika se nuwe ambassadeur in Amerika aangestel.
Die strategiese skuif volg op ’n uitdagende jaar van diplomatieke spanning onder die Trump-administrasie.
Meyer sal Ebrahim Rasool vervang wat in Maart verlede jaar deur die Amerikaanse regering persona non grata verklaar is.
Hoewel Meyer ontken dat hy reeds van die aanstelling weet, het die departement van internasionale betrekkinge bevestig dat ’n besluit geneem is.
Die 78-jarige Meyer was die hoofonderhandelaar namens die Nasionale Party tydens die onderhandelingsprosesse voor die politieke oorgang in die land.
Meyer het destyds vanuit konserwatiewe Afrikanerinstellings onder kritiek deurgeloop vir sy hantering van die onderhandelingsproses.
Hy het tot 1996 as minister in Nelson Mandela se kabinet gedien en is sedert 2006 ’n lid van die ANC.
Volgens die uitvoerende hoof van Solidariteit, dr. Dirk Hermann, sal sy aanstelling geen vertroue onder gewone Afrikaners skep nie. “Dit is nie die antwoord vir die herstel van verhoudinge nie. Dis nog ’n fout in die reeks foute van die regering met hulle verhouding met die Amerikaanse regering,” sê Hermann.
