Redaksie
Die oprigting van ’n bergingsfasiliteit ter waarde van R18,5 miljoen het steeds nie plaasgevind nie ten spyte daarvan dat daar reeds meer as R1,1 miljoen aan konsultasiegeld bestee is. Die projek behels die oprigting van ’n sentrale bergingsfasiliteit vir watermeters in Mangaung wat tans op verskeie plekke regoor die metro gehou word.
Volgens ’n VF Plus-raadslid in die Mangaung-metro, Valerie de Kock, is die dienskontrakte van Nala Construction Services en Mogalemole Consulting Engineers reeds drie jaar aan die gang, maar die beplanningsfase het steeds nie tot konstruksie gelei nie. Die metro vra nou dat die kontrakte tot September 2027 verleng word.
De Kock sê geen pakkamer behoort drie jaar se beplanning te verg nie. Tog is meer as R1,1 miljoen reeds aan konsultasiedienste bestee sonder enige sigbare resultaat.
Die VF Plus het die afgelope week tydens ’n raadsvergadering geëis dat die metro ’n vorderingsverslag aan die raad voorlê wat uiteensit presies watter werk vir die R1,1 miljoen gelewer is en wie aanspreeklik gehou gaan word vir die feit dat daar ná drie jaar steeds geen vordering of gebou is om daarvoor te wys nie.
Lees meer berigte in dié uitgawe van Nuusweek – https://www.pretoriafm.co.za/wp-content/uploads/2026/07/NUUSWEEK-Uitgawe-73-03-Jul-2026.pdf
