Die burgerregteorganisasie, AfriForum het ‘n volledige lys van plaasmoorde aan die minister van Polisie, Senzo Mchunu, oorhandig ná sy bewering dat slegs een plaasmoord tussen Oktober en Desember 2024 plaasgevind het.
Volgens AfriForum is daar egter agt bevestigde gevalle, insluitend ‘n aanval waarin ‘n ma en dogter ontvoer en vermoor is.
Die organisasie beskuldig die regering daarvan dat hy óf oningelig is óf doelbewus die krisis onderspeel. Volgens AfriForum is verskeie pogings om ‘n gesprek met die regering te voer, geïgnoreer en politieke leierskap ontbreek steeds.
AfriForum se hoofwoordvoerder vir gemeenskapsveiligheid, Jacques Broodryk, wys daarop dat hul buurtwagte steeds nou saamwerk met die Suid-Afrikaanse Polisiediens, ondanks die regering se ontkenningsveldtog. Hy spreek kommer uit oor die president se volgehoue ontkenning van die erns en omvang van plaasmoorde in die land.
Die organisasie herbevestig sy verbintenis om plaasmoorde te dokumenteer en om landelike gemeenskappe te beskerm, ondanks die regering se poging om die probleem te minimaliseer.
