Pieter Koen bring nuwe energie na Pretoria FM se Top 20

Pieter Koen, gewilde Afrikaanse sanger en televisiepersoonlikheid, maak binnekort sy terugkeer na die radiogolwe as die nuwe aanbieder van Pretoria FM se Top 20. Vanaf 5 April neem hy die leisels van die program oor en sal luisteraars sy kenmerkende energie en ervaring in die ateljee kan waardeer.

Koen, wat vroeër ‘n omroeper by Radio Rippel was en die gewilde KykNET-program Jukebox op Saterdagaande aangebied het, het onlangs saam met sy gesin na Amerika verhuis. Hy keer egter terug na Suid-Afrika vir nog ‘n opwindende uitdaging – as mede-aanbieder van VIA se eerste regstreekse ontbytprogram wat op 14 April begin.

Dié veelsydige aanbieder het ook in die verlede die Afrikaanse Top 20 op Jacaranda FM hanteer en is opgewonde om weer agter die mikrofoon in te skuif. “Terug agter die mikrofoon – halleluja!” het hy gesê toe hy gevra is om die program aan te bied.

Sarina Bosman, programkoördineerder van Pretoria FM, glo Koen gaan ‘n vars en dinamiese aanslag bring. “Pieter het vrye teuels wat die formaat van die program betref. Ek dink die luisteraars gaan sy aanslag geweldig geniet. Dis ook lekker om iemand met sy ervaring by die radio betrokke te hê,” sê sy.

Vir Koen is hierdie geleentheid nie net ‘n professionele mylpaal nie, maar ook ‘n emosionele een. “Pretoria FM is vir my ’n spesiale stasie – dit was een van die eerste plekke waar ek as nuwe kunstenaar ’n radio-onderhoud gedoen het. Dit voel vir my soos ’n tuiskoms,” sê hy.

Hy voeg by: “Radio was nog altyd een van my groot passies, en om terug te wees agter die mikrofoon maak my kinderlik opgewonde.”

Luisteraars kan uitsien na ‘n top 20-program met ‘n vars energie, boeiende musiek en Koen se unieke persoonlikheid wat die program na nuwe hoogtes gaan neem. Luister elke Saterdagmiddag van 16:00-18:00 na die WeBuyCars Pretoria FM SA Top 20.