Die verhoor van drie beskuldigdes in die diefstal van miljoene rand se buitelandse valuta van President Cyril Ramaphosa se Phala Phala-plaas in 2020 is tot 15 September uitgestel.
Dié beskuldigdes, Emmanuela David, Floriana en Ndilinasho Joseph het vandag in die Modimolle-streekhof in Limpopo verskyn op aanklagte van sameswering tot huisbraak, diefstal en geldwassery.
Volgens die woordvoerder van die Limpopo NVG, Mashudu Malabi-Dzhangi, is die saak uitgestel weens Floriana se mediese toestand – sy is hoogswanger. Die aansoek om uitstel is nie teengestaan nie, en die hof het dit toegestaan.
Die verhoor sal van 15 September tot 8 Oktober vanjaar plaasvind.
Die staat beplan om meer as 20 getuies tot die getuiebank te roep.
