Leiers van die March and March-beweging het deelnemers aan die beplande 30 Junie-betogings teen ongedokumenteerde buitelanders gewaarsku om nie aan plundering of geweld deel te neem nie.
Die organiseerder, Jacinta Ngobese-Zuma het in Durban gesê die fokus moet slegs op vreedsame betoging wees en dat enige kriminele optrede die beweging se boodskap sal ondermyn.
Die groep eis onder meer dat onwettige immigrante die land verlaat, strenger visumbeheer en optrede teen korrupsie en werkgewers wat ongedokumenteerde werkers in diens neem.
President Cyril Ramaphosa het Suid-Afrikaners intussen versoek om kalm te bly en teen geweld en vreemdelinge-haat te waak, terwyl die regering ’n nuwe, strenger migrasiebestuurstrategie implementeer om grensbeheer en wetstoepassing te versterk.
