Die hooggeregshof in Pretoria het in die guns van Solidariteit en die DA beslis in hul dringende aansoek om die skorsing van Johann Mettler as die Tshwane-metro se stadsbestuurder tersyde te stel.
Die hof het bevind dat die regerende koalisie onwettig opgetree het en nie politieke mag kan gebruik om munisipale reëls te omseil nie.
Volgens die DA het die metroraad probeer om beheer oor die stad se begroting te gryp deur lojale amptenare te beskerm en eerlike personeel uit te werk.
Die DA se burgemeesterskandidaat in die metro, Cilliers Brink het aan Pretoria FM gesê dat hierdie ’n belangrike oorwinning in die oorlog teen staatskaping is.
“Ons bestudeer nog die volle uitspraak, maar uit die bevel is dit duidelik dat Johann Mettler nou kan terugkeer werk toe en dat die metro verbied word om enigsins effek te gee aan die onregmatige stemproses wat op 9 Julie afgespeel het in die raadsaal, hangende die uitkoms van die hoofhersieningsaak. Ons boodskap aan al die amptenare van die Tshwane-metro wat bereid is om die regte ding te doen, selfs al is die gevolge in die kort termyn negatief, is: Ons sal julle ondersteun, net soos wat ons Johann Mettler ondersteun het,” het Brink gesê.
Die DA beklemtoon dat die uitspraak bewys dat wetteloosheid gevolge het vóór die komende plaaslikeregeringsverkiesing.
Solidariteit se uitvoerende hoof, dr. Dirk Hermann beskryf ook die uitspraak as ’n oorwinning vir Mettler, “wat die slagoffer van ’n politieke magspel was”. Mettler is ’n lid van die vakbond.
Hermann het gesê reëls is misbruik om ’n politieke doel te bereik, ten koste van ’n individu.
“Solidariteit se belang was nie die politiek nie, maar die beskerming van die individu se regte.”
