Die Mej. Suid-Afrika-organisasie het in ‘n verklaring aangekondig dat sy uitvoerende hoof, Stephanie Weil, bedank het.
Die organisasie het haar alle sterkte toegewens vir haar toekoms nadat die twee partye ‘n ooreenkoms kon bereik. Die nuus kom kort nadat die organisasie vroeër vanjaar ook die bedanking van sy jare lange kreatiewe direkteur, Werner Wessels aangekondig het.
Daar heers tans verwarring oor vanjaar se Mej. Suid-Afrika kompetisie omdat die top 30 vroue nog nie aangekondig is nie – ‘n aankondiging wat tradisioneel in Mei gedoen word.
Weil is reeds die afgelope ses jaar die organisasie se uitvoerende hoof.
Die woordvoerder van die Mej. Suid-Afrika-organisasie, Kenneth Makhanya, hou vol dat hulle op dreef is om die top 30 aan te kondig en meen 2025 se kompetisie sal ‘n sukses wees, ondanks die verwikkelinge.
Weil het nog net ander mense se boodskappe oor haar bedanking op haar sosiale media-platforms gedeel, maar het nog nie self van haar laat hoor nie.
Foto: Jewish Report
