Meegevoel stroom steeds vanuit verskeie oorde in ná die dood van die bekroonde Suid-Afikaanse akteur, Jonathan Pienaar.
Hy is gister in die ouderdom van 63-jaar in Johannesburg oorlede, nadat hy aan hartversaking gely het.
Sy voormalige vrou, Rosana Maya, het die nuus op sosiale media bevestig.
Sy het op haar Facebookbladsy geskryf: “My pragtigste man, unieke siel… Soos jou wolwe het jy soveel gegee in ruil vir so min. Die wêreld is ’n armer plek sonder jou daarin. My hartseer is te diep. Vlieg saam met die engele, my lief.”
Pienaar het ‘n roemryke loopbaan van meer as drie dekades gehad en was ‘n bekende in huishoudings weens sy rolle in sommige van die land se mees ikoniese produksies, soos Blood Diamond in 2006, Cape Town in 2015 en The Gospel According to Matthew in 1993.
Hy het ook rolle in verskeie TV-reekse, waaronder Triptiek, Vloeksteen, Pandjieswinkelstories, Binnelanders en Legacy, vertolk
Pienaar se gedenkdiens en begrafnisreëlings sal later bekend gemaak word.
